"Нам улууһун спордун сулустара" кинигэ биһирэмэ

 Нэһилиэкпит өрөгөйдөөх күнүгэр "Эйгэ" саҥа көлүөнэ библиотекатыгар Нам улууһуттан бэтэрээннэргэ бастакынан САХАВА бочуоттаах маастарын аатын ылбыт Саха Өрөспүүбүлүкэтин физкультуратын уонна спордун  туйгуна,  Нам улууһугар аҕыс төгүл спорду сырдатыыга бастыҥынан бэлиэтэммит Россия Суруналыыстарын сойууһун чилиэнэ, 5 хоһоон хомуурунньугун ааптарынан буолбут СР суруйааччыларын сойууһун чилиэнэ,  1 Хомустаах нэһилиэгин Ытык киһитэ А.М.Софронов-Онтуон  спорт туһунан төрдүс «Нам улууһун спордун сулустара» саҥа кинигэтин сүрэхтэниитэ буолла. 

   Бу үөрүүлээх дьоро күҥҥэ  Офсет» тэрилтэ менеджерэ, СР суруйааччыларын сойууһун ситэриилээх сүбэтин чилиэнэ, СР үөрэҕириитин туйгуна Г.Г. Басылыйканова – Кэнтик кыыһа,  улуустааҕы «Отуу уота» литературнай түмсүү салайааччыта А.М.Татаринов-Удьурҕай уонна кини чилиэннэрэ Н.К. Федотов-Уран Утум, Н.Н. Бурнашев-Куола Уола, М. Мохначевская - Марта-Мария, З.В. Нератова - Тупсууна, П. Байанаева. Кинигэҕэ киирбит Нам улууһун спордун сулустара, биир дойдулаахтарбыт - мас-рестлинг экс-маастара, норуоттар икки ардыларынааҕы “А” категориялаах судьуйа Н.Э. Констанитинов, сахалартан бастакы гроссмейстер, Нуучча дуобатыгар Россия уонна СР үтүөлээх тренера А.Г.Азаров, СР, Россия  спордун маастара С.М. Охлопков уо.д.а. Кыһыл лиэнтэнэн баайыллыбыт буруолуу сылдьар аһылла илик саҥа кинигэни үөрүүлээх быһыыга астылар  “Хомустаах 1-кы нэһилиэгэ” МТ аҕа баһылыга В.Г. Жирков, “Офсет” ХЭТ менеджерэ Г.Г. Басылыйканова уонна ааптар Анатолий Софронов-Онтуон. Хомустаахпыт нэһилиэгэр «Нам улууһун спордун сулустара» диэн кинигэ күн сирин көрбүтүнэн бэйэ-бэйэбитин эҕэрдэлэһэн ытыс дохсун тыаһын бэлэхтэстибит. Кинигэ туһунан кылгастык билиһиннэрэр буоллахха - Саха сиригэр физкультурнай хамсааһын төрүттэммитэ 100 сылыгар ананан 130 ахсаанынан, Дьокуускай куоракка “Дани-Алмас” хампаанньаҕа ахсынньы ый 25 күнүгэр 2023 сылга таҥыллан таҕыста. Хомуйан оҥордо Софронов А.М., сүрүн редактор Р.Е.Никифорова. Кинигэ уопсайа 7 бастан турар. Бастакы баһа – Бастакы көлүөнэ саҕахтара, иккис баһа – Иккис көлүөнэ кирбиилэрэ, үһүс баһа – Үһүс көлүөнэ эрэллэрэ, төрдүс баһа – Саха сирин уонна Арассыыйа нормативтарыгар үстүү көрүҥҥэ спорт маастардара, бэһис баһа – Көҥүл тустууга уонна хапсаҕайга спорт маастардара, алтыс баһа – Атын көрүҥнэргэ иккилиитэ спорт маастардара, сэттис баһа – Араас сылларга спорт сайдыытыгар бэйэлэрин кылааттарын киллэрбит спорт үлэһиттэрэ, тренердэрэ уонна спорт маастардара. Кинигэҕэ араас сылларга Нам улууһугар спорт сайдыытыгар бэйэлэрин кылааттарын киллэрбит спорт үлэһиттэрин, тренердэрин уонна спорт маастардарын хаартыскалара Сивцев П.И. аат. Намнааҕы история уонна этнография түмэлин архыыбыттан, XX, XXI “Манчаары оонньууларын” кинигэлэриттэн уонна ааптар тус архыыбыттан туһаныллыбыттар. 

Манна даҕатан бэлиэтээтэххэ, Анатолий Михайлович спорт туһунан бастакы «Нэhилиэкпит спордун историятын туоhулара» диэн кинигэтэ 2012 сыллаахха бэчээттэнэн тахсыбыта. Бу өйдөбүнньүк кинигэ биһиги нэһилиэкпитигэр олорон ааспыт улахан ситиһиилэрдээх спортсменнар сырдык кэриэстэригэр анаммыта. Нам улууһугар 2014 с-ха Саха сирин 6-с Спортивнай оонньууларыгар ананан тахсыбыт «Спортивная слава долины Энсиэли» кинигэ автордарыттан биирдэстэрэ буолар. Үһүс “Аан бастакынан” диэн кинигэтигэр 1-кы Хомустаахпыт спордун сайдыытыгар биир бастакынан кылааттарын киллэрбит спортсменнар тустарынан сырдатыллыбыт.

Биһиги Наммыт уонна Сахабыт сирин спордун сэҥээрээччилэригэр ананан тахсыбыт төрдүс кинигэ - Анатолий Михайлович хайдах курдук спорду өрө тутарын, билигин даҕаны спорт эйгэтин олоҕун арахсыспат үтүө аргыһа оҥосторун, спорт эйгэтигэр толору бэриниилээҕин туоһулуур уонна үүнэр көлүөнэ ыччакка үтүө  холобурунан буолар.

Төрөөбүт нэһилиэкпит спордун историятын киэҥ эйгэҕэ сырдатар кылааккын сыаналыыбыт уонна Анатолий Михайловиччка барҕа махталбытын тиэрдэбит!