Ньургун Тимофеев сырдык кэриэһигэр

Бүгүн, олунньу 7 күнүгэр, биллиилээх биир дойдулаахпыт, государственнай-общественнай деятель Ньургун Семенович Тимофеев төрөөбүтэ 60 cылын туолар

Кини тус олоҕун уонна үлэтин төрөөбүт өрөспүүбүлүкэтэ туруктаахтык сайдарыгар анаабыта. Ньургун Семенович үтүө аата саха дьонун өйүгэр-санаатыгар, биир дойдулаахтарын сүрэхтэригэр букатыннаахтык хаалыаҕа уонна кини өрөспүүбүлүкэ устуоруйатыгар алмааһы кырыылыыр уонна ювелирнай бырамыысыланнаһы төрүттээччилэртэн биирдэстэринэн билинэбит.

СӨ бар дьонун дьокутаатынан үлэлиир сылларыгар норуот хаһаайыстыбатын бары салааларын күүскэ өйөөбүтэ. Кини быһаччы кыттыытынан өрөспүүбүлүкэҕэ нэһилиэнньэлээх пууннары газтааһын тосхоло ылыныллыбыта. Бу тосхол экэниэмикэ сайдыытыгар уонна Саха сирин дьонун олоҕун уйгута тупсарыгар саҥа усулуобуйаны тэрийбитэ.

Ньургун Семенович салалтатынан СӨ үһүс ыҥырыылаах Ил Түмэнин үлэтигэр үгүс саҥа сүүрээннэр киирбиттэрэ. Ол курдук, 2005 с.  дьокутаат ирдээн көрүүтүн туһунан балаһыанньа бигэргэтиллибитэ. 2006 с. ИЛ Түмэн иһинэн уопсастыбаннай төрүккэ үлэлиир үс уорган тэриллибитэ - СӨ Ил Түмэнин иһинэн Ыччат парламена, СӨ Ил Түмэнин иһинэн национальнай бэлиитикэҕэ, судаарыстыба уонна итэҕэл түмсүүлэрэ хардарыта сыһыаннаһыыларыгар хамыыһыйата, СӨ Ил Түмэнин бэрэссэдээтэлин иһинэн муниципальнай тэриллиилэр талыллар уорганнарын бэрэссэдээтэллэрин Сэбиэтэ, итиэннэ СӨ ИЛ Түмэнин энергетикаҕа, тутууга уонна олоххо-дьаһахха коммунальнай хаһаайыстыбаҕа сис кэмитиэтэ.

Өрөспүүбүлүкэ Парламена ураты болҕомтотун АЛРОСА АХ тула үөскүүр быһыыга-майгыга уурара. Ону таһынан СӨ Ил Түмэнин уопсастыбаннай приемнайа арыллыбыта уонна Парламент пресс-сулууспата тэриллибитэ.

Ньургун Тимофеев сырдык аатыгар

Эҥсиэли хочотун чулуукан ыччата –

Хомустаах сириттэн тахсыбыт Ньургуммут!

Күн бүгүн ааттааммыт, эн дойдуҥ ыччата, 

Саныыбыт, ахтабыт, дьулуурдаах Ньургуммут!

Кыһыҥҥы дьыбарга күн сирин көрөҥҥүн 

Самныбат тулуурдаах эн, Ньургун, буолбутуҥ,

Тулалыыр айылҕаҥ кэрэтин сөҕөҥҥүн

Оҕо саас ымыылаах дьолунан туолбутуҥ!

Ааҕарга, суоттуурга баҕаран, тардыһан

Оскуола боруогун атыллаан киирбитиҥ,

Билиигэ-көрүүгэ дириҥник  дьаныһан

Оскуола биир бастыҥ туйгуна эн этиҥ!

Өркөн өй күүһүнэн билиигин хаҥатан

Үрдүктэн үрдүгү дабайан  ылбытыҥ,

Кэскиллээх олоҕу барҕардар санааттан

Үгүһү-элбэҕи ситиһэн кыайбытыҥ!

Эн, Ньургун, билэриҥ алмаас таас чаҕыла

Сахабыт сиригэр туһалыыр кыахтааҕын,

Эн, Ньургун, ол онтон барыһы аҕала

Өссө да ылсыһан үлэлиир кыахтааҕыҥ!

Эн бастыҥ депутат, спикер  буолаҥҥын

Дьон-сэргэ туһугар сыраҕын биэрбитиҥ,

Үрдүкү салайар үлэҕэ тахсаҥҥын

Ырааҕы көрөөччү сүбэһит буолбутуҥ.

Төрөөбүт дойдугар эргиллэн кэлэргэр

"Үс сэргэ", ытык сир, эйигин көрсөрө,

Эҥсиэли хочотун үөһэттэн көрөргөр

Астыныы, дуоһуйуу абылыы кууһара.

Төрөппүт иитиитин, учуутал үтүөтүн

Махталлаах тылынан сылаастык ахтарыҥ,

Тулалыыр бар дьонуҥ үөрүүтүн-көтүүтүн

Эн тэҥҥэ үллэстэн мичээрдээн ыларыҥ.

Оо, Ньургун, чаҕылхай сулустуу күлүмнээн

Олохтон эрдэлээн барбытыҥ абатыан!

Оо, Ньургун, кытыастар күн күүстээх сандааран,

Бар дьоҥҥун сирдиэҕиҥ хаалбыта кыһыытыан!

Бу орто дойдуга дьолломмут күннэргин,

Дьулуурдаах, тулуурдаах кыайыылаах кэмнэргин

Куруутун саныахпыт, ахтыахпыт турдаҕа,

Эн ааккын ааттыырбыт салҕана туруоҕа!

Удьурҕай

1.02.2023 с.