Олоҥхо күннэрэ саҕаланнылар

 Биһиги республикабытыгар үгэскэ кубулуйбут Олоҥхо декадата саҕаланна. 

    2005 сыллаахха ЮНЕСКО, Олоҥхо - киһи-аймах духуобунай баайын уус-уран шедеврэ буоларын биллэрбитэ. Ол кэнниттэн Олоҥхону үйэтитиигэ үгүс үлэ ыытылынна. Биһиги нэһилиэкпит культура эйгэтин үлэһиттэрэ олоҥхобут сайдыытыгар үлэлэһэллэр, сэмэй кылааттарын киллэрэллэр. Ол курдук, сэтинньи ый 21 күнүгэр "Эйгэ" саҥа көлүөнэ библиотека "Ситим" ааҕар саалатыгар  "Олоҥхо - ийэ тыл оһуора", "Саха Боотурдара" диэн серия иһинэн тахсыбыт кинигэлэр быыстапкалара турда.  "Айылгы" кыраайы үөрэтэр зонаҕа, Нам улууһун биллэр олоҥхоһута Е.А. Охлопков-Буоратай 125 сылыгар анаммыт "Саханы ааттатыа олоҥхо.." кинигэтин быыстапката кини олоҕун, айар үлэтин туһунан билсиһиннэрэр. Кэлбит ыалдьыттар Оҕо искусствотын оскуолатын үөрэнээччилэрин  "Олоҥхо оҕо хараҕынан" (сал. Иванова Ю.М., Татаринова С.Э.) уруһуйдарын быыстапкатын көрүөхтэрэ. 

     Сэтинньи 22 күнүгэр Олоҥхо декадата оскуола үөрэнээччилэригэр анаан "Эпосы народов России" фестивалынан саҕаланна. Бу күн, 5 кылаас оҕолоругар "Олоҥхо - биһиги киэн туттуубут" медиаурок көрдөрүлүннэ, оҕо искусствотын оскуолатын фольклор кылааһын оҕолоро норуот ырыаларын ыллаан дьиэрэттилэр. Салайааччылара Руфова А. И. уонна Винокуров У. Н. "Олоҥхо геройдарын тойуктара" диэн маастар-кылааска  П.П.Ядрихинскай-Бэдьээлэ "Дьырыбына Дьырылыатта" олоҥхотуттан, ис-истэриттэн иэйэн-куойан Дьырыбына-Дьырыалыатта, Сорук-Боллур, Абааһы Уолун уо.д.а геройдар тойуктарын оҕолорго толорон болҕомтолорун тартылар. Түмүккэ, “Олоҥхо мүччүргэннээх сырыылара” диэн остуол оонньуутугар күрэхтэстилэр. Оонньууга таабырыннары таайан, өс хоһооннору салҕаан, олоҥхо туһунан боппуруостарга сөптөөх эппиэттэри биэрэн Уйгулаана Муксунова эрэллээхтик бастаата. 2-с миэстэҕэ - Нарыйаана Муксунова, 3-кэ - Ангелина Сивцева таҕыстылар. Оонньууну тэрийэн ыыттылар Оҕо искусствотын оскуолатын театральнай кылааһын оҕолоро Петров Леня, Гаврильева Милена. Декада чэрчитинэн,  оскуола оҕолоро аны атын омуктар, эбэҥкилэр, буряттар, киргизтар уо.д.а. омуктар эпостарын кытта билсиэхтэрэ.