Ыам ыйын 18 күнүгэр Саха Cиригэр Ньургуһун күнүн бэлиэтиир үтүө үгэһи суруналыыс Иван Ушницкай 2004 сыллаахха олохтообута. Бу официальнай бырааһынньык буолбатах. Ол эрээри уһун кыһын кэнниттэн кэрэни кэрэхсээн, маҥнайгы сибэккини уруйдуур бэйэтэ туспа иэйиилээх түгэн. Сахаларга ньургуһун олус чугас. Бэйэбит курдук, тымныыттан толлубакка тахсан, олоххо дьулуһар бастакы сибэккибит. Ол иһин суруйааччы үксэ ньургуһуҥҥа анаабыт хоһоонноох. Элбэх ырыа да айыллыбыта. Олортон саамай биллэллэрэ бу:
Хара сир устун саас маҥнай
Хааман иhэр кэрэтиэн!
Сэрэммиттии оргууй аҕай
Сири көрөн иhэбин.
Халдьаайы ахсын тэтэрэннэр,
Ньургуhуннар үүммүттэр,
Таптал курдук нарын, сэмэй,
Тыыннаах буолар эбиттэр!
Номох буолбут сахам кыыhын --
Ньургуhуну санаатым,
Таптыыр кыыспар кини аатын
Иҥэриэхпин баҕардым.
Саха норуотун уоһуттан түспэккэ ылланар өлбөт үйэлээх «Ньургуһуннар» ырыа ааптара Иннокентий Дмитриев-Сиэн Чолбодук бу ырыа хоһоонун устудьуоннуу сылдьан суруйбута. Ырыа матыыбын саха литературатын учуонайа Василий Никитич Протодьяконов айбыта.
Ньургуһуну ырыанан иэйии киһиэхэ уонна төрөөбүт дойдуга тапталга, тоҥ буору тобулан, хаары-мууһу быыһынан күн диэки тардыһар күүһү биэрэр.
Комментариев нет:
Отправить комментарий