Айар куттаах Александр Дунаев

      СӨ суруйааччыларын Сойууһун чилиэнэ, бэйиэт, мелодист, СӨ култууратын үтүөлээх үлэһитэ, СӨ муниципальнай сулууспатын, СӨ култууратын, СӨ тыатын хаһаайыстыбатын туйгуна, М. К. Аммосов аатынан анал бэлиэ хаһаайына, Николай Рыкунов аатынан бириэмийэ лауреата, Нам улууһун, Хамаҕатта нэһилиэгин Бочуоттаах олохтооҕо Александр Григорьевич Дунаев, олунньу 18  күнүгэр үбүлүөйдээх 70 сааһын  туолла.
      Кини айар талааннаах киһи – уостан түспэт ырыа, кэпсээн, хоһоон ааптара буолар. "Эйэ, дьол туһугар", "Хамаҕатта - мин дойдум", "Суруйда көмүс куорсун", "Иккиэн ыллыыбыт", "Күн сиригэр уол оҕо төрөөн","Уу уонна тиит" уо. д. а. поэтическай хомуурунньуктардаах, ырыанньыктардаах.
      Александр Григорьевич Намнааҕы педагогическай училищены бүтэрэн баран Сэбиэскэй Аармыйа кэккэтигэр сулууспалаабыта. Кэлин Хабаровскайдааҕы государственнай педагогическай институт художественнай-графическай отделениетын бүтэрбитэ. Хамаҕатта орто оскуолатын дириэктэринэн, төрөөбүт нэһилиэгин Сэбиэтин бэрэссэдээтэлинэн, өрөспүүблүкэтээҕи норуот Айар дьиэтин фольклорга отделын сэбиэдиссэйинэн, Ил Түмэн Государственнай Мунньаҕын бэрэссэдээтэлин көмөлөһөөччүтүнэн, хонтуруоллуур кэмитиэтин сүрүн специалиһынан үлэлээбитэ.
       Хамаҕаттатын нэһилиэгэр баһылыгынан талыллан сатабылаах салайааччытын көрдөрбүтэ, нэһилиэнньэни араас уопсастыбаннай үлэҕэ-хамнаска көҕүлүүр, тэриэйэр, олохтоохторго, ыччаттарга өрүү сүбэ-ама буоларынан ытыктанар общественник, нэһилиэгэр баар "Соттой" диэн памятник ааптара, «Эҥсиэли» хаһыат общественнай корреспондена. 
         Александр Григорьевыһы юбилейынан итиитик - истиҥник эҕэрдэлиибит!

        Үтүө доруобуйаны, саҥа сиһитиилэри, уһун үйэни, дьолу-соргуну баҕарабыт!