Ахсынньы 22 күнэ - Максим Кирович Аммосов төрөөбүт күнэ

 

Бүгүн ахсынньы ый  22 күнүгэр «Эйгэ» саҥа көлүөнэ библиотекатыгар уһулуччулаах государственнай уонна политическай деятель, киэн туттар биир дойдулаахпыт, ытык киһибит М.К.Аммосов төрөөбүтэ 125 сылынан Д.Ф.Алексеев аат. 1 Хомустаах орто оскуолатын 6-11 кылаас үөрэнээччилэригэр (сал. Томская А.А., Павлова Д.К.)  “Үйэлэргэ өлбөт дьон үөскүүллэр, төрөппүтэ оннук уолу Хатырык...” диэн медиаурок ыытылынна.

    Бары өттүттэн дьоҕурдаах, киэҥ билиилээх Максим Аммосовпыт Сахабыт сирэ үүнэ-чэчирии сайдарын туһугар, ону таһынан  Казахстан, Киргизия республикалара сайдыыларыгар саҥа аартыктары арыйбытын туһунан сэргээн иһиттилэр, саҥа тахсыбыт кинигэлэри билистилэр уонна  “Буурҕаһыт мохсоҕол  бу Намтан көппүтэ» Намнааҕы П.И.Сивцев аатынан историко-этнографическай музей киинэ архивыттан документальнай киинэни көрдүлэр.

Нам улууһун Чаҕылхай Махсыыма, саха норуотун биир киэн туттар чулуу уолун үтүө аата үйэлэргэ умнуллубат! 

Чаҕылхай Махсыымҥа

Нам сирин чаҕылхай сулуһун

Киэҥ тутта куруутун саныыбын,

Эҥсиэли хочобут хоһуунун

Омуоһап Махсыымы ааттыыбын.

Дьадаҥы ыарахан олохтон

Бар дьонун сырдыкка  сирдиирэ,

Үтүөнү баҕаран дьонуттан

Түмсүүлээх буолары  ирдиирэ.

Ол ааспыт үйэҕэ хорсуннук

Хотойдуу кыырайа  көппүтэ,

Дойдутун туһугар дьоһуннук

Ыллыктаах тыллары  эппитэ.

Ытыллар олохтон балыллан,

Хараҥа хаайыыга  хатанан

Ыралаах санаата сабыллан,

Олохтон барбыта,  сарбыллан.

Оҥорбут үтүөтэ эргиллэн

Сахабыт норуота  үөрбүтэ,

Чаҕылхай Махсыыммыт ааттанан

Сырдык күн иккистээн  тыкпыта.

Татаринов А.М.-Удьурҕай, 1 Хомустаах