Муксунова Мария Михайловна бастыҥ уопутуттан үллэстэр

Сэтинньи ый 16 күнүэр Саха республикатыгар Ийэ сылын чэрчитинэн, "Эйгэ" саҥа көлүөнэ библиотекатын туонатыгар "Тыа сирин ийэтин үтүө сүбэлэрэ" диэн бэрт истиҥ, сэргэх тэрээһин буолан ааста. Бу күн нэһилиэкпит ааҕааччыларыгар сэттэ оҕо иһирэх ийэтэ, оҕуруоччут Мария Михайловна Муксунова доруобуйаҕа туһалаах, бэйэ ооҕуруотун аһыттан үрдүк үүнүүнү ыларга, араас сибэккилэри олордорго бастыҥ уопутуттан сырдатта, кэккэ сүбэлэри биэрдэ, ону тэҥэ, бэйэтэ оҥорбут оҕуруотун астарыттан амсатта. Ол курдук, санберияттан ураты, минньигэс амтаннаах барыанньа, кабачоктан барыанньа, компот, оҕурсуттан, помидортан, моркуоптан уо.д.а кэнсиэрбэлэммит хаһаастарыттан мустубут ыалдьыттары күндүлээтэ. Дьиэ-кэргэн дохуотун үксэтэргэ бэйэ оҕуруота улахан төһүү күүс буолара саарбаҕа суох. Сылын аайы, саас рассада олордуута, сайынын көрүүтэ-харайыыта, уу кутааһына, күһүнүн хомуура элбэх сыраны-сылбаны ылар. Дьэ, манна Муксуновтар дьиэ кэргэнинэн бары көмөлөөн көрөллөр-харайаллар, өлгөм үүнүүнү ылаллар. Тыа оҕотун үлэнэн иитии көдьүүстээҕин, бу дьиэ кэргэн холобуругар көрөбүт..Ону барытын хаартыскалаах стендэлэр туоһулууллар. Мария Михайловнаҕа төһүү күүһүнэн кэргэнэ Петр Иванович (чааһынай урбаанньыт), улахан уолаттара буолаллар, ийэтэ Посельская Галина Васильевна, бастыҥ сүбэһит, кини үйэтин-сааһын тухары "Нам" совхозка агрономунан таһаарыылаахтык үлэлээбитэ. Ону таһынан, Муксуновтар дьиэ кэргэн араас таһымнаах улуснай, республиканскай күрэхтэргэ актыыбынайдык кытталлар. Ол курдук, "Сельская семья Республики Саха (Якутия)-2013" күрэххэ ситиһиилээхтик кыттыбыттара, онтон 2019 с. бу күрэххэ кыттан, II миэстэни ылан 50 тыһ. сууммалаах сертификатынан наҕараадаламмыттара. 2013 сыллаахха улуустааҕы "Сельчанка - хозяйка своей земли" күрэххэ "Сайдам Хотун" номинация кыайыылааҕа, "Многодетная семья-2019" күрэх кыайыылааҕа, Бэлиэтээн эттэххэ, Мария Михайловна 5 кылааска үөрэнэр кыыһа Уйгулаана республикатааҕы "Экология начинается с семьи" күрэххэ "Мама - экопросветитель" (сал. Колесова Е.В.) диэн үлэтинэн ситиһиилээхтик кыттыа диэн эрэнэбит.