Билсиҥ, сэргээҥ, САҤА КИНИГЭ!

             “Хоһоон кэһиилээх
                Кэллим эһиэхэ
                Сахам дьонугар,
               Хомус тыаһынан
               Дуораччы доҕуһуоллатан
               Дууһам иэйиитин   

              Дьиэрэччи ыллатан...”         

    Алтынньы ый 19 күнүгэр «Истиҥ эйгэ» литературнай саалабытыгар олохтоох автор, СР суруйааччыларын Союһун чилиэнэ, 1 Хомустаах нэһилиэгин Ытык киһитэ Н.К.Федотов  “Санаам ситимнэрэ” диэн саҥа кинигэтин сүрэхтэниитэ бэрт сэргэхтик буолан ааста.  Быйыл Арассыыйа норуоттарын культурнай нэһилиэстибэтин үйэлээх баайын уонна Сахабыт сиригэр Автономия тэриллибитэ 100 сылынан, бу ураты бэлиэ сылга биһиги бэйиэппит Николай Константинович 4-с кинигэтэ күн сирин көрдө. 

     Николай Константинович Бүлүү улууһун 1-кы Чочу нэһилиэгэр 1956  сыллаахха балаҕан ыйын 18 күнүгэр төрөөбүтэ. 1962 сыллаахха Нам оройуонун I Хомустаах нэһилиэгэр көһөн кэлбиттэрэ. Бастакы Хомустаах орто оскуолатын 1974 сыллаахха бүтэрбитэ. Икки сыл Советскай Армия кэккэтигэр ытык иэһин чиэстээхтик толорбута. Армия кэнниттэн “Нам”  совхозка, оскуолаҕа рабочайынан үлэлээбитэ.  Николай хоһоон айыытынан дьарыгын оскуолаҕа үөрэнэр сылларыттан саҕалаабыта. 1993 сыллаахтан нэһилиэк иһинэн тэриллэн үлэлиир “Төлөн” литературнай түмсүүгэ дьарыктаммыта. Бастакы хоһоонноро 1989 с-ха “Ленин суола” хаһыакка бэчээттэммиттэрэ. Бу кэмтэн ыла айар эйгэ сырдык сүүрээнигэр куустарбыта. Айымньылара  “Эҥсиэли”, “Саха сирэ”, “Кыым”, “Олох суола” хаһыаттарга бэчээттэнэн тахсыбыттара, тэттик хоһоонноро “Чолбон”, “Күрүлгэн” сурунаалларга тахсыталаабыттара. 2008 сыллаахтан Нам улууһун “Отуу уота” литературнай түмсүү чилиэнэ.  2007 сыллаахха улуустааҕы И.Е.Винокуров 100 сылыгар аналлаах хоһоон күрэҕэр 2-с миэстэни ылбыта. П.А.Ойуунускай сылыгар аналлаах өрөспүүбүлүкэтээҕи хоһоон күрэҕэр 2-с  миэстэнэн бэлиэтэммитэ. 2011 сылтан Саха Өрөспүүбүлүкэтин  суруйааччыларын Сойууһун чилиэнэ. 1 Хомустаах нэһилиэгин Ытык киһитэ. “Хомустаах 1–кы нэһилиэгэ” МТ “Өрөгөйүн ырыатын” ааптара. Кинигэлэрэ: “Иэйии эйгэтигэр” (2008), “Сардаҥа сыыйыллар ыллыгар” (2009), “Кыылларбыт, көтөрдөрбүт” (2010). 

     Николай Федотов бу буруолуу сылдьар саҥа “Санаам ситимнэрэ” диэн кинигэтэ “Дани-Алмас” компания издательствотыгар  бэчээттэнэн таҕыста. Кинигэ 2 түһүмэхтэн турар: 1 түһүмэх аата “Күн сирэ киһиэхэ баҕалаах”. Бу түһүмэххэ тумус туттар суруйааччыларбыт айымньыларын анаарыыта, төлкөлөөх төрөөбүт тылбытыгар харыстабыллаах сыһыан туһунан ыстатыйалар киирбиттэр, ол курдук айар тыл аҕата А.Е.Кулаковскай-Өксөкүүлээх Өлөксөй, Нам улууһун ааттаппыт суруйааччыларбыт Таллан Бүрэ, Н.М. Рыкунов, Иван Иннокентьев уо.д.а. II түһүмэх “Айар арыыга айан” диэн, бу манна автор кэккэ сылларга суруйбут уран тыл оһуордаах хоһоонноро ааҕааччы болҕомтотун тардыаҕа, ону  таһынан төрөөбүт нэһилиэкпитигэр  сыһыаннаах хоһооннор киирэннэр бу түһүмэҕи ситэрэн биэрэллэр. Кинигэ 47 страницалаах, уопсай ахсаана 50 экземпляр. Киирии тылын киэн туттар биир дойдулаахпыт, СР Суруйааччыларын сойууһун чилиэнэ Антон Михайлович Софронов-Онтуон суруйбут. Кинигэ ааҕааччы киэҥ эйгэтигэр ананар. Саҥа кинигэҕэ киирбит хоһооннору  Д.Ф.Алексеев аат. 1 Хомустаах орто оскуолатын 11 кылааһын үөрэнээччитэ Айыына Эверстова уонна “Төлөн” түмсүү чилиэннэрэ - А.И. Руфова, М.Г. Мылаханова, С.П. Тумусова, Т.Н. Соловьева иэйэн-куойан туран аахтылар. Н. Федотов айар үлэтигэр сыһыаннаах викторина кыайыылааҕынан Соловьева Т.Н. тахсан автортан саҥа кинигэни бэлэх тутта. Улуустааҕы «Отуу уота» литературнай түмсүү аатыттан  А.М. Татаринов-Удьурҕай, А.М. Софронов-Онтуон, Д.Ф. Алексеев аат. 1 Хомустаах орто оскуолатын саха тылын уонна литературатын учуутала А. А. Томская, "Алгыс" НАК коллектива, "Төлөн" литературнай түмсүү чилиэннэрэ, автор эдэр сааһын доҕотторо, бииргэ үөрэммит кылааһынньыктара уонна  нэһилиэкпит аҕа баһылыга В.Г. Жирков истиҥ  эҕэрдэлээх алгыс  тылларын тиэртилэр. Хоһооммут түһүлгэтин түмүктүүр чааһыгар автор Н.К.Федотов бүгүнҥү үөрүүлээх түгэн кыттыылаахтарын минньигэс тордунан күндүлээтэ. 

    "Эйгэ" саҥа көлүөнэ библиотекатын аатыттан Николай Константиновичка  ааҕааччылары кэрэхситэр айымньыларын айыллан, саҥаттан саҥа кинигэлэрин бэчээттэнэн тахса турдуннар диэн баҕа санаабытын тиэрдэбит! Эйиэхэ дьол-соргу тосхойдун, баҕарабыт үрдүк чыпчааллары, үгүс үтүмэн үөрүүлэри! Саха поэзията чэчирии сайда турдун! Алгыс баһа сыаланнын!