"ДАНИЛОВ ДЬЫКТААНА"

   Муус устар 15 күнүгэр  үгүс көлүөнэ  саха дьоно  сөбүлээн ааҕар чулуу суруйааччыта Софрон Петрович Данилов биир былаһааккаҕа республика олохтоохторун түмтэ. 

   Горнай улууһун П. Д.Аввакумов аатынан Киин библиотека "Даньыылап дьыктаана" аахсыйаны республика олохтоохторугар тэрийэн ыытта.  Аахсыйа норуодунай суруйааччы, бөдөҥ общественнай деятель төрөөбүтэ 100 сылыгар ананна. Бу күн, оруобуна биир болдьоммут чааска республика 24 улууһун уонна Дьокуускай куорат библиотекаларыгар уонна оскуолаларыгар дьыктаан суруйуута ыытылынна. Киэҥ нэлэмэн Сахабыт сирин  улуустарыгар уонна нэһилиэктэригэр олорор, үлэлиир дьоммут, үөрэнэр ыччаттарбыт көхтөөхтүк кытыннылар.

   Дьыктаан кыттыылаахтара суруйааччы олоҕун, айар, общественнай үлэтин арыйар  25 боппуруостаах тургутууга хоруйдаан билиилэрин чиҥэтэн,  умнубуттарын санаан, эбии чахчылары билэн тарҕастылар.  Барыта 25 киһи кыттыыны ылла, ол иһигэр 1 Хомустаах орто оскуолатын 9-10 кылааһыттан 14 үөрэнээччи, 11 улахан дьон (3-һэ эдэр ыччат). 

  Өрүүтүн даҕаны саха чулуу дьонун үйэтитэр  тэрээһиннэр ыытылла турдуннар! Норуот таптала үйэттэн үйэҕэ сөҕүрүйбэккэ көлүөнэттэн көлүөнэҕэ салҕана туруохтун!

 "Бары ааҕабыт" (Читаем все) республикатааҕы проект иһинэн ыытыллыбыт акцияҕа кыттыыны ылбыт дьоммутугар истиҥ махтал!

Даньыылап дьыктаана кыттыылааҕа, бу Туоһу суругу хачайдаан ылыаххын сөп (хартыынаны баттаа).