Олунньу 13 күнэ - Төрөөбүт төрүт тыл уонна сурук-бичик күнэ

 Олунньу 13 күнүгэр Төрөөбүт ийэ тылбыт күнэ сарсыардаттан олохтоох администрация планеркатыгар уус-уран ааҕыынан саҕаланна. Нэһилиэкпит үлэ тэрилтэлэрин уонна общественнай түмсүү салайааччылара олохтоох поэттарбыт, СР суруйааччыларын сойууһун чилиэннэрэ Н.К. Федотов-Уран Утум, А.М. Софронов-Онтуон уонна А.М. Татаринов-Удьурҕай хоһооннорун аахтылар. 

 Бу күн оскуола үөрэнээччилэригэр аналлаах "Таптыыр сахам тылынан..." өрөспүүбүлүкэтээҕи дьыктаан "Эйгэ саҥа көлүөнэ библиотекатыгар буолла. Дьыктаан сыалынан үөрэнээччини саха литэрэтиирэтигэр, төрөөбүт тылга уһуйуу, төрөөбүт тылынан сөпкө саҥарар-суруйар таһымын үрдэтии уонна сатабылын иҥэрии буолар. Бу бэлиэ күҥҥэ оҕолор бары сахалыы таҥнан-симэнэн,  бэриллибит тургутук сорудахтарын боччумнаахтык олорон толордулар. Тэрээһиҥҥэ күүс-көмө буолбут 1 Хомустаах орто оскуолатын саха тылын уонна литературатын учууталыгар Алена Алексеевна Томскаяҕа махталбытын биллэрэбит!