Россияҕа учуутал уонна Аҕа сүбэһит, Саха сиригэр Үлэ сылынан, бөдөҥ государственнай, общественнай-политическай деятель, бөлүһүөк суруйааччы, поэт, талааннаах тылбаасчыт П.А. Ойуунускай төрөөбүтэ 130 сылыгар аналлаах муус устар 14 күнүгэр "Эйгэ" саҥа көлүөнэ библиотекатыгар алын сүһүөх 3-4 кылааһын үөрэнээччилэригэр аналлаах III республикатааҕы "Ааҕар түһүлгэ" литературнай күрэх онлайн ZOOM платформа нөҥүө буолан ааста.
Бу бырайыак 2016 сылтан саҕаланан быйыл 7-с төгүлүн ыытылынна. Д.Ф. Алексеев аат. орто оскуола алын сүһүөх кылаас учууталларын холбоһуга уонна "Эйгэ" саҥа көлүөнэ библиотеката көҕүлээһининэн ыытыллар күрэхпит сүрүн сыалынан-соругунан алын сүһүөх кылаас оҕолорун ааҕыыга сыһыарыы, үбүлүөйдээх суруйааччылар олохторун уонна айымньыларын билиһиннэрии, айымньыларын үөрэтии буолар.
Быйылгы күрэххэ Нам улууһун Партизан орто оскуолатын "Күнчээн", С.Е. Сивцев-Таллан Бүрэ аат. Бөтүҥ орто оскуолатын "Хотойук", И.Е. Винокуров аат. Хатыҥ-Арыы орто оскуолатын "Өрүөллэр", Д.Ф. Алексеев аат. 1 Хомустаах орто оскуолатын "Хомустаах кэскилэ" уонна Дьокуускай куораттан П.И. Кочнев аат. Тулагы орто оскуолатын "Кустук", Амма улууһун А.П. Рязанскай аат. Соморсун орто оскуолатын "Хоодуоттар" хамаандалара кыттыыны ыллылар.
Литературнай турнир барыта 4 түһүмэҕинэн ыытылынна. Кыттааччылар I-кы түһүмэххэ П.А. Слепцов-Ойуунускай олоҕун уонна айар үлэтин туһунан "Ойуунускай олоҕун олуктара" диэн тест-викторина боппуруостарыгар бэриллибит бириэмэҕэ эппиэттээтилэр, II-c "Кэриэһим-кэннибэр хааларым" түһүмэххэ литературнай монтаж уонна III-с түһүмэххэ "Ойуунускайы ааҕан баран..." буктрейлер (видео-реклама) күрэҕэр хамаандалар эрдэ видео устан ыыттылар.
I түһүмэххэ "Ойуунускай олоҕун олуктара" диэн тест-викторинаҕа 1-кы миэстэни "Күнчээн" (Партизан), 2 миэстэни "Хотойук" (Бөтүҥ), 3-с миэстэни "Хомустаах кэскилэ" (1 Хомустаах) хамаандалар ыллылар. "Кэриэһим - кэннибэр хааларым" түһүмэххэ 1-кы миэстэҕэ - "Хоодуоттар" (Соморсун, Амма), 2 миэстэҕэ "Өрүөллэр" (Хатыҥ-Арыы), 3 миэстэҕэ "Хомустаах кэскилэ" (1 Хомустаах) хамаандалар тигистилэр. "Ойуунускайы ааҕан баран" түһүмэххэ 1-кы - "Өрүөллэр", 2-с - "Хомустаах кэскилэ", 3-с "Хоодуоттар" хамаандалар ыллылар. Уопсай түмүккэ 1 миэстэни И.Е. Винокуров аат. Хатыҥ-Арыы орто оскуолатын "Өрүөллэр" хамаандата, 2-с миэстэҕэ "" Д.Ф. Алексеев аат. I Хомустаах орто оскуолатын оҕолоро уонна 3-с миэстэҕэ "Хоодуоттар" Амма улууһун А.П. Рязанскай аат. Соморсун орто оскуолатын хамаандалара таҕыстылар. Муҥутуур кыайыылаахха Анал бэлиэ, II, III миэстэлэргэ дипломнар, салайааччыларга, кыттыбыт оҕолорго туоһу суруктар туттарылыннылар. Хас түһүмэх аайы туспа дьүүллүүр сүбэ үлэлээтэ. Ол курдук, викторинаны "Эйгэ" саҥа көлүөнэ библиотекатын сэбиэдиссэйэ Жиркова Н.Д., оскуола библиотекара Константинова Л.Г., олохтоох дьаһалта сүрүннүүр специалиһа Коврова С.И., литературнай монтааһы саха тылын, литературатын учуутала Павлова Д.К., оҕо искусствотын оскуолатын этнотеатральнай кылааһын преподавателэ Винокуров У.Н., "Эйгэ" саҥа көлүөнэ сүрүннүүр библиотекара Сивцева Л.П., буктрейлеры 1 Хомустаах орто оскуолатын алын кылааһын учуутала Винокурова С.Н., "Ыллык" оҕо телестудиятын салайааччыта Избекова А.В., общественнай корреспондент Москвитина Е.П., сыаналаатылар. Бары кыттыыны ылбыт үөрэнээччилэргэ, учууталларга, дьүүллүүр сүбэҕэ улахан махталбытын тиэрдэбит! Аны кэлэр "Ааҕар түһүлгэ" литературнай күрэх икки сылынан ыытыллара торумнанна. Аныгыс көрсүөххэ диэри...
Комментариев нет:
Отправить комментарий